تقوی اختیار کریں
جتنا ممکن ہوسکے گناہوں سے بچنے کی کوشش کریں۔ ایسے گناہوں کے بارے میں جاننا شروع کریں جن سے اللہ سخت ناراض ہوجاتا ہے۔ اگر اللہ ناراض ہوجائے تو اسے منانے کی کوشش کریں۔ اللہ کی ناراضی سب سے گھاٹے کا سودا ہے۔ تقوی یعنی گناہوں سے پرہیزگاری کے ساتھ ساتھ اپنا سارا کام کرتے ہیں۔ جتنا ممکن ہوسکے اچھے اور نیک عمل کریں۔ جتنا آپ کا تقوی ہوگا اتنا ہی اللہ کی مدد بھی آپ کے ساتھ ہوگی ان شاء اللہ
حلال و حرام میں فرق رکھیں
اپنے بینک اکاؤنٹس کو مکمل طور پر اسلامی بینکنگ یا کرنٹ اکاؤنٹس (جن پر سود نہ ملے) پر منتقل کریں۔ اگر کہیں مجبوری میں کوئی سودی منافع آ بھی جائے، تو اسے ثواب کی نیت کے بغیر غرباء میں صدقہ کر دیں۔ فری لانسنگ میں یہ دھیان رکھیں کہ آپ ایسے پراجیکٹس یا کلائنٹس کے ساتھ کام نہ کریں جو براہِ راست سودی اداروں، گیمبلنگ، شراب یا غیر اخلاقی مواد سے جڑے ہوں۔ آپ کی مہارت (مثلاً کوڈنگ، ڈیزائننگ، ٹیچنگ، رائٹنگ، ہیلنگ، کوچنگ، کاونسلنگ وغیرہ) بالکل حلال ہے، بس کلائنٹ اور پروجیکٹ کی نوعیت کو چیک کرلیں۔
ایک مسلمان جب اپنی فیلڈ میں مہارت (Excellence) دکھاتا ہے، تو وہ اسلام کا علمبردار بھی بن سکتا ہے
بطورِ پروفیشنل اپنے وعدوں کے پکے رہیں۔ وقت پر کام دینا، ڈیڈ لائنز پوری کرنا اور کلائنٹس کے ساتھ دھوکہ نہ کرنا عین اسلامی تعلیم ہے۔ نبی کریم ﷺ کا فرمان ہے کہ اللہ تعالی اس بات کو پسند کرتا ہے کہ جب تم کوئی کام کرو تو اسے بہترین طریقے سے کرو۔ جب آپ کا کام بولے گا، تو لوگ خود بخود پوچھیں گے کہ آپ کی کامیابی کا راز کیا ہے۔
گیمنگ آج کی نوجوان نسل کا ایک بڑا مشغلہ ہے، اور آپ اس میں بھی ایک "مومن گیمر" کی بہترین مثال بن سکتے ہیں۔
گیمنگ کو صرف ایک انرجی ریفریشمنٹ رکھیں، گیمنگ کو اپنی زندگی کا مقصد نہ بنائیں بلکہ مقصد غلبہ اسلام رکھیں۔ اپنی گیمنگ مہارت کو اسلام کے لیے استعمال کریں۔ باقی آن لائن گیمنگ کمیونٹیز میں بدزبانی، غصہ اور فضول وقت کے ضیاع سے بچیں۔ اگر آپ گیمنگ اسٹریمنگ بھی کرتے ہیں، تو وہاں اپنی گفتگو اور اخلاق سے یہ ثابت کریں کہ ایک اچھا مسلم گیمر کیسا ہوتا ہے۔ اسپورٹس مین بننے کی کوشش کریں۔
اگر آپ ٹیچنگ بھی کرتے ہیں توآپ کے پاس لوگوں کی فکری تربیت کا زبردست ذریعہ موجود ہے۔
اپنے اسٹوڈنٹس کو صرف کتابی علم نہ دیں، بلکہ انہیں حلال رزق کی برکت، محنت کی عظمت اور ڈیجیٹل دور میں اخلاقی اقدار کا درس بھی عملی طور پر دیں۔ جب اسٹوڈنٹس دیکھیں گے کہ ان کا ٹیچر خود بھی حلال رزق پر سختی سے عمل کرتا ہے اور جھوٹ اور دھوکے بازی کے بغیر آگے بڑھ رہا ہے تو وہ آپ سے متاثر ہوکر ضرور آپ کو کاپی کرنے کی کوشش کریں گے ان شاء اللہ
اسلام صرف لفاظی سے نہیں پھیلا بلکہ طاقت، کردار اور دعوت سے پھیلایا گیا
لوگ آپ کی ایمانداری سے ضرور قائل ہوں گے اگر آپ ان کے ساتھ ایمانداری سے بزنس کریں گے۔ اپنے معاملات اور پیسوں کے لین دین کو صاف اور واضح رکھیں گے۔ اپنے اصولوں پر سمجھوتہ نہ کریں گے۔ سچ بولیں گے، امانت میں خیانت نہ کریں گے۔ یاد رکھیں حضور نبی کریم صلی اللہ علیہ وسلم کی پہچان اعلان نبوت سے پہلے کیا تھی؟ صادق اور امین - باقی دعوت اور نبوت کا کام بعد میں شروع ہوا تھا۔ پہچان وہ پہلے ہی بنا چکے تھے اپنے عمل اور کردار سے۔ اگر آپ سے فری لانسنگ کے دوران کوئی غلطی ہو جائے تو اسے فورا تسلیم کریں۔ اپنی کمیونٹی، دوستوں یا ساتھی فری لانسرز کی مشکل وقت میں مدد کریں (قرضِ حسنہ یا بغیر غرض کے رہنمائی کے ذریعے)۔
یہی وہ نقطہ ہے جہاں سے انقلاب شروع ہوتا ہے۔ اگر آپ اپنی ذات، اپنی کمائی، اپنے اخلاق اور اپنے روزمرہ کے فیصلوں کو اللہ کے حکم کے مطابق ڈھال لیں، تو آپ اکیلے ہی ایک چلتی پھرتی مثال بن جائیں گے۔ پہلے اپنے آپ کو ایسا پریکٹیکل مسلمان بنائیں جسے دیکھ کر دوسرے کو دین سے محبت ہو جائے پھر ان شاء اللہ دنیا میں اثرات پھیلنا بھی شروع ہوجائیں گے اللہ کے حکم سے۔ وہ اپنے نیک بندوں کی ضرور مدد کرتا ہے جو اخلاص سے کام کریں اور ثابت قدم رہیں صبر کرتے ہوئے۔
